羅致光拍片宣傳青協背包跑
[2018.02.21] 發表
【明報專訊】現今年輕人都好大壓力，為關注佢哋嘅情緒健康，香港青年協會喺4月29日將再度舉辦「青協背包跑 2018」，參加者要孭起背包同書本，象徵分擔年輕人壓力。青協請到勞工及福利局長羅致光為活動拍片，局長喺片中話，希望大家可以支持背包跑，因為呢個活動可以為大家紓緩壓力。佢自言經常孭住背囊周圍去，而個背囊都幾重，「如果能夠放低背囊，有如釋重負嘅感覺，自然精神煥發，所以減壓真係好緊要！」
「青協背包跑 」今年喺科學園舉行，設10公里同3公里賽事，又有個人、隊制、家庭、學校及機構等組別，個人組報名費200元、隊制挑戰組720元。活動後仲設有獎問答遊戲，有機會贏到香港航空首爾來回經濟客位機票同馬拉松訓練課程名額。青協表示，今次活動所籌得嘅款項，會用喺青協嘅「青少年全健精神科資助計劃」，畀有需要青年能夠及早接受精神科診治。
更多港聞
相關新聞
