【明報專訊】參加泛民九龍西初選嘅民主黨袁海文，噚日喺facebook上載同藝人羅霖嘅合照，羅霖話見到袁過去落力推動規管美容業，希望更多市民支持佢出選。但去到晚上，合照突然「下架」，Emily聽聞係因為有人受「壓力」，因此唔可以公開支持袁。袁海文回覆Emily話，強調自己無受壓，但「有人有壓力」，為免尷尬就唔方便透露詳情。

Emily聽聞有第三方人士向民主黨表示，羅霖受到壓力，因此希望將帖刪除。袁海文話，為免尷尬唔講詳情，但明言經歷呢件事後，更有決心跟進規管美容業一事。

另一方面，政圈傳聞參加泛民九龍西初選嘅馮檢基，喺周日初選投票時已安排好旅遊車，載支持者去實體票站投票，有姚松炎嘅支持者就喺網上呼籲，「姚松炎無旅遊巴，1tag10個靠大家」，呼籲支持者1拖10咁去投票。

馮檢基拍片自比李克勤 「嬲」多過「like」

出道30年嘅歌手李克勤今年終於拎到商台「叱咤樂壇男歌手」金獎，民協馮檢基噚日就喺facebook上載短片，講到有人話佢係「政壇李克勤」。佢聲稱同李有共通點，指對方熱愛唱歌，自己就熱愛香港，同樣喺香港默默耕耘幾十年。但Emily噚晚見短片引嚟嘅「嬲嬲」多過「like」，有網民話條片係「關公災難」，又形容馮自比李克勤係太睇得起自己。