【明報專訊】中文大學新亞書院院長黃乃正早前寫信斥責中大學生會前會長周竪峰對待幾個內地生時態度「粗暴惡劣」，新亞學生會其後發公開信反駁，但上款將黃乃正寫咗「黃乃共」，學生會噚日仍然堅稱係「手民之誤」，考慮會向黃院長道歉之餘，又叫寫錯「周豎峰」個名嘅黃院長道歉。 講番黃乃正日前出信，話周竪峰用粗口辱罵內地同學，又用「支那人」侮辱國人，對此深表遺憾，仲話新亞兩位創辦人錢穆同唐君毅如果仲在生，都會對佢嘅表現深感痛心。不過，信中周竪峰就寫咗做「周豎峰」。 中大新亞學生會之後發公開信回應黃乃正，但就用「致黃乃共院長╱敬啓者」為上款。學生會幹事方潔儀接受電台訪問，仍然話寫錯院長名字係手誤，之後喺facebook留言部分做更正，唔肯喺網上修正原文，仲解釋話如果偷偷地更正係更加唔尊重對方。 法政匯思成員任建峰噚日喺facebook評論新亞學生會，話聰明同「懶」聰明往往是一線之差，一唔小心，就會變成「自以為係威係勢、其實係阿癸」，佢原文解釋﹕「即是連『唔醒』的『阿丙』都不如」。任建峰又話佢對事不對人，話自己好憎人「too clever by half」。 新亞書院校董會副主席陳志新認為，「乃共」二字相當敏感，學生嘅解釋喺邏輯上唔能夠接受，「(外界)不是沒有智慧，(寫錯)黃乃『好』都可以，但寫錯做黃乃『共』……」
|
| |
| |
;)
