【明報專訊】唔知大家有無發覺，近排唔同官員差唔多每日都輪流落區，又派吓禮物包探市民，又同地區人士見面呀咁。其實呢個係特首林鄭月娥畀問責官員嘅功課，佢早前要求官員同佢一樣，能經常近距離接觸市民。Emily聽聞林太要求問責官員要喺兩年內走勻18區，計吓條數頻率都幾高喎！ 若做足要求 共落區288次 Emily聽聞林太要求官員落區唔係就咁參觀吓機構、家訪就算，講明要佢哋同當區區議員傾偈一個鐘，藉此了解民生事務。計落若個個問責官員做足要求，18區嘅民政事務專員就最忙碌，因3司13局每人都去18區，即落區共288次，平均每周有幾次官員落區。 另外，政府噚日公布「共慶回歸顯關懷」新一批官員落區名單，佢哋會探訪各區嘅長者同有需要家庭，表達關懷。其中運輸及房屋局長陳帆、發展局長黃偉綸今日分別去中西區同深水埗區；次輪就到勞工及福利局長羅致光，佢下星期一去元朗區，而商務及經濟發展局長邱騰華就會喺下周二去北區。由於佢哋都係新上任局長，而連任官員早已派咗福袋，等佢哋派埋就完成任務，但記住呢啲係唔計喺林太要求嘅走勻18區㗎。
|
| |
| |
;){kind=small}
;)
