臨別請食散水餅 高永文唔捨得攝影機「陣」

臨別請食散水餅高永文唔捨得攝影機「陣」

[2017.06.29] 發表

【明報專訊】第4屆政府任期即將完結，多名將會離任嘅問責官員噚日最後一次出席立法會大會，回答議員質詢。臨別依依，唔少官員都趁機會同一眾議員留影道別，食物及衛生局長高永文果然不負「民望高」嘅稱號，最識做，特登買咗幾盒好精緻嘅西餅請議員食。而在旁經民聯立法會議員林健鋒就話，西餅只係餐前菜，稍後會再約高永文「鋸牛扒」正式道別。

多名建制派議員喺會議點人數等開會期間，亦上前同高永文握手道別，佢一一抱拳答謝。答完最後一條口頭質詢嘅高永文就話鬆一口氣，因為每次答問題都要準備好多文件。

陳家強最唔捨得記者

臨別之際，記者梗係問吓官員對立法會有咩唔捨得，高永文就話，最不捨係傳媒喺走廊擺設嘅一排攝影機，因為每次經過時，呢個「陣」都好懾人。

財經事務及庫務局長陳家強就笑話：「最唔捨得你哋。」商務及經濟發展局長蘇錦樑就同議事堂內記者一齊留影。保安局長黎棟國神情輕鬆，但就無咩臨別贈言喇，只係對記者們微笑擺手。