【明報專訊】回歸20周年進入倒數階段，除咗政府推出一連串大型活動之外，地區各社團亦積極籌謀活動，出錢又出力。例如九龍社團聯會本月27日，就喺香港文化中心音樂廳舉行音樂會，特別邀請到國家級上海愛樂樂團演出，並由世界級指揮家湯沐海擔任演出總指揮。屆時香港歌劇院一眾青年演唱家都會聯手表演。其實籌備一場大型活動一啲都唔易，理事長王惠貞透露，佢哋要早一年提前訂場，活動亦大出血本，預算過百萬。過佢就話，消息一出，會員反應好踴躍，發現香港真係有好多音樂發燒友。

雖然國家主席習近平來港嘅消息沒有正式公布，但唔少地區人士都心照不宣，預計同過往安排類似，或者有家訪、閱兵等活動。九龍社團聯會會長陳振彬噚日喺傳媒茶敘裏面，就大爆領導人胡錦濤10年前到烏溪沙青年新村出席交流會嘅趣事。佢話自己當時係時任青少年發展聯會會長，全場得自己一個提前知道胡錦濤會出席，而年輕人都係當日去到現場，畀人沒收手機先知道。當日保安安排非常嚴謹，話說青年新村入口處旁邊有民居高樓，可能有高空狙擊嘅風險，當時特登喺出入口位攞遮擋嘅充氣棚，保護領導人安全。