【明報專訊】市民捐唔到血可能因為血紅素唔夠，香港紅十字會話，今個月6日至12日，有885人血紅素唔夠需要暫緩捐血，當中約七成半、即666人係女士。紅會教路，飲「烏豆黑木耳木棉魚湯」補充鐵質，因為烏豆(黑豆)含豐富鐵質，仲有不飽和脂肪酸，有助預防心血管疾病，如果唔鍾意木棉魚(大眼雞)，可改用大魚尾或鯽魚。 呢款湯嘅材料包括黑豆、浸好嘅黑木耳各一両，薑兩片。黑豆用白鑊炒至豆衣裂開，魚煎到兩面金黃，黑木耳切細片。將適量嘅水煲滾，加入魚同其他材料，大火再煲滾後，轉中慢火煲個半鐘頭，再落少少鹽調味。建議飲湯時食埋啲黑豆。 紅十字會又喺facebook公布，前日(周二)有1025人登記捐血，收集咗780袋血液，並多謝市民支持，令血庫存量逐漸回穩，但長遠都希望大家可定期捐血，以維持供應穩定。
|
| |
| |
;)
