【明報專訊】教育局長吳克儉任內經常外訪，但不時被人質疑成效，教育界立法會議員葉建源噚日透露，吳克儉2015年喺加拿大舉行嘅國際教學專業會議(ISTP)會議，口頭表示香港有意申辦2017年會議，但之後無咗下文，主辦單位其中一名負責人，就喺去年德國會議對此公開表示不滿。教育局長新聞秘書回覆查詢時承認，吳克儉喺前年會議講過有興趣申辦ISTP，但強調無實質討論。 去年出席德國會議嘅葉建源話，由於香港教育嘅國際聲譽好高，2015年會議嘅與會者對香港申辦ISTP好有期望，以為吳克儉真係想申辦，並期待吳克儉喺去年德國會議正式提交計劃。 回應葉建源批評﹕無實質討論 只不過主辦方喺去年會議前多番向吳克儉查詢都收唔到消息，最終吳克儉缺席去年會議，香港申辦ISTP嘅期望就此「幻滅」。葉建源批評吳克儉此舉「無厘搭霎」，仲話事件影響香港形象。 教育局長新聞秘書解釋，教育局長辦公室去年1月已通知主辦方，吳克儉唔會出席去年3月舉行嘅德國會議，「葉議員對此可能有所不知，但在沒實據情况下提出指摘，我們對此表示遺憾」。 葉建源就不滿答案，強調自己嘅主要質疑，係吳克儉喺2015年會議表明有意申辦2017年會議，而唔係有無出席2016年會議。佢形容教育局嘅回覆係默認無就2017年會議與對方作任何討論，「原因就係對方未能與教育局取得聯繫，又如何作實質討論呢？」
|
| |
| |
;)
