【明報專訊】沙田馬場上月賽馬發生墮馬事件，3歲馬「飛鶯」左前腳折斷，被當場人道毁滅，有關注動物權益團體人士翻查馬會資料，指從2014至16年，至少有28匹馬遭人道毁滅或暴斃，當中絕大部分喺賽事中意外斷腳，或因操練過度而死亡。團體人士噚日喺網上發起聯署行動，要求馬會善待馬，甚至長遠應取締賽馬活動。 阻練馬過度 長遠盼取消賽事 聯署信要求，馬會應訂立因訓練或比賽而令馬受傷嘅罰則，例如需停賽或罰款等，以阻嚇過度操練馬嘅練馬師；又指最終希望可全面取締賽馬活動，因為賽馬屬殘忍運動。聯署信引述動保團體PETA嘅報告，話賽馬業界繁殖者會針對賽馬配種出跑速快嘅馬，但呢啲馬嘅四肢往往會過幼，有較高折斷風險。該信又批評，當馬受傷，對練馬師同馬主再無利用價值，於是就用「乾淨快捷」嘅「人道毁滅」方法處理。 馬會：已聘數百員工照顧 賽馬會回應指一直致力保障馬嘅健康和福祉，聘用數百名受過專業訓練嘅員工，專責為馬提供最高水平嘅護理和照料。對於會唔會停止人道毁滅，或要求馬主照料馬一世，馬會無就此回應。 馬會話喺每場賽事前後，獸醫同醫生團隊均會密切監察，以確保參賽馬可以喺最短時間內獲得適當護理支援。 ■聯署內容可瀏覽﹕bit.ly/2pT7ESn
|
| |
| |
;){kind=small}
;)
