【明報專訊】被民間團體稱為「公民廣場」嘅政府總部東翼前地，自2014年一直「重門深鎖」，公民黨郭榮鏗及自由黨鍾國斌公開向候任特首林鄭月娥建議重開；而原來民建聯劉國勳近月都低調咁去信現任政務司長張建宗及林太，話𠵱家政總係時候回復正常運作，政府唔需要斬腳趾避沙蟲喎。 稱對政府形象唔好 劉國勳上月去信張建宗，問司長幾時先至會重開東翼前地，其後行政署覆函，但都不置可否。劉國勳於是喺本月初改向候任特首提出同樣建議。劉國勳提出嘅理由或者同郭榮鏗及鍾國斌唔同，後兩者話咁做有助修補社會撕裂，而劉國勳就認為，政總大門常關，對政府形象及權威都唔係太好，而且要公務員行天橋側門入口返工都好唔方便。 劉國勳話，佔中等事件已經過咗去，涉事者有啲都判刑，有啲已檢控，事件應該完結，當年一啲臨時措施應撤銷。 佢話政府若擔心，可仿效立法會示威區咁，重開東翼前地時定一啲使用規矩，如果有人破壞秩序，依法處理就得。 劉國勳同Emily提到呢件事，話之前低調去信，係因為太高調做事反而可能做唔成，仲話民主黨胡志偉提出特赦論就係一個例子，但既然其他黨派議員都公開要求林太重開東翼前地，咁佢都不妨開聲，希望林太諗吓。
|
| |
| |
;){kind=small}
;)
