【明報專訊】有網民近日瘋傳港島薄扶林水塘附近山徑發現有人留低唔少垃圾，又懷疑呢啲垃圾係由慈善機構「點滴是生命」於周日搞嘅慈善越野挑戰賽「揹水一戰」遺下。「點滴是生命」嘅負責人就回覆，話工作人員當日要喺夜晚清理垃圾，因為太黑而「清漏咗」，之後會檢討做法，唔畀呢件事再發生。

主辦稱天色太黑未發現 會檢討

「點滴是生命」剛喺周日(3月12日)舉辦慈善越野挑戰賽「揹水一戰」，參加者需揹負4.5公升水，由香港仔嘉諾撒培德書院行到去香港仔郊野公園，籌得嘅款項將會用於發展供水慈善項目，例如喺尼泊爾同柬埔寨山區建設水設施。

不過，網民盧先生於同日晚上行山，路經比賽路段薄扶林水塘時，發現一袋垃圾同兩個發泡膠箱，打開見到入面有果皮同食物包裝紙，懷疑係「揹水一戰」嘅大會留低。佢同Emily講，當時只好孭住啲垃圾上山頂分類回收，雖然事隔兩日，佢依然好嬲，仲話大會「籌款建設其他地方嘅山區，但就破壞香港郊野」，呢個做法好唔要得！

Emily聯絡「點滴是生命」了解，佢哋嘅營運總監李秀芬解釋，當日活動分咗6個分站，每個分站都有義工駐守，而義工離開前會將所有垃圾包好，等活動之後就會有支援車巡邏分站時順道帶走，但支援車去到薄扶林水塘分站時已經係傍晚，工作人員因為太黑而無發現，未將所有垃圾清走，先會有遺漏。佢又話會檢討今次嘅做法，唔會再畀同一事件發生。