【明報專訊】林鄭月娥噚日手持579張提名表格報名參選特首，點知有多人到場示威「贈興」，現場一度混亂。其間Emily見到一名穿西裝男士有啲熟口面，睇真啲，原來佢係警察學院前院長鄭仕廉(鄭sir)，點解佢會喺度呢？

Emily事後問番鄭sir，問佢係咪加入咗林鄭月娥嘅競選辦、去保護林太乎？鄭sir就話﹕「我負責保護黃生啫！」翻查資料，鄭sir喺2013年10月離職後，翌年加入信和旗下信和護衛任職總經理，今次選舉，信和集團執行董事黃永光出任林太競選辦副主任，信和嘅公關大佬邱文華亦借調林辦幫手，唔通信和連保安大佬鄭sir都調咗入林辦？鄭sir就強調噚日只有自己一條友在場，因為黃生在場，否認自己係林辦中人；問佢一條友保護黃生係咪好危險？現場係咪好混亂？慎言嘅鄭sir就話不評論喇。

Emily問咗邱文華信和有幾多保安人員到場，佢話無資料補充。