【明報專訊】特首參選人林鄭月娥早前表發競選政綱，有唔少標榜「新」嘅政策，不過立法會前主席曾鈺成就質疑「是不是今日的娥要打倒昨日的娥」。曾鈺成話，林太每項承諾都標榜一個「新」字，意味如果佢做特首，下屆政府施政煥然一新。但曾鈺成認為林太既然曾經係權力唔細嘅政務司長，點解昔日見有啲政策有問題時無提出嚟呢。

曾鈺成喺《am730》專欄話，或者有啲事例如公共財政，政務司長係管唔到，要做咗特首先可以盡展抱負。「可是，政務司司長的權力還是不小的；一位『好打得』的政務司司長，對政府的管治方式和風格，不可能沒有影響吧」。

曾鈺成舉例，林太𠵱家認為教育政策出現問題，但「她做教育局局長的上司時有察覺到嗎？有指出過嗎？」又質疑林太提出的「置業新希望」從何而來，指地荒屋缺嘅問題係上屆政府留低，「上屆政府的發展局局長，叫林鄭月娥」。對於曾鈺成嘅質疑，林鄭月娥話政務司長唔能夠代表局長處理所有政策局工作。

另外，對於近日傳出特首梁振英最快下個月會晉身全國政協副主席，自由黨田北俊接受商台《在晴朗的一天出發》訪問時話，自己2014年因為代表香港人講嘢，公開叫CY辭職，而被全國政協「炒魷魚」，質疑如果CY同時出任全國政協副主席同特首，「如果有起事嚟，到底你係代表中央講嘢，定係代表香港人呢？」