【明報專訊】做過保安局長嘅立法會議員葉劉淑儀係政務官(AO)出身，與前特首曾蔭權(煲呔)共事多年，葉太受訪大爆當年聽到曾蔭權將接替董建華出任特首時，認為會對香港造成「好大傷害」，形容對方係「醒目香港仔」，但唔適合做特首。 葉太接受商台節目《雲常開》訪問，佢話2005年喺外國讀書，一聽到「董下曾上」嘅消息，第一個反應係「唔係嘛，點可能啊？」，佢話加入政府時已經認識曾蔭權，「知佢點啦」，認為曾蔭權會對香港「好大傷害」，故當時決定「要返去救吓香港，要為香港做啲嘢」。 指「醒目仔走精面」 不宜任特首 佢批評曾蔭權在任7年來無咩做過事，指今時今日土地房屋短缺，同佢嘅施政有好大關係，形容對方係「醒目香港仔」，唔適合做特首，眼光唔夠長遠、廣闊，又指醒目仔就係「走精面」，一國兩制本來好難實施，「純粹靠走精面就出事」。葉太又強調，唔係因為對方醜聞纏身先事後孔明咁批評。 葉太話，董建華下台對佢個人係好事，相信中央當時係想搵公務員做特首而揀曾蔭權，但結果由曾做特首令人失望。
|
| |
| |
;)
