【明報專訊】九龍灣迷你倉火警引起社會關注，網上仲整日傳言滿天飛，一時話燒到塌樓，一時又傳政府疏散附近居民，有旅行社利用事件宣傳、區議員喺火場影合照，借事件抽水而鬧出「關公災難」。 火警現場噚日突然出現兩架政府租用嘅巴士，就有人話係政府用嚟疏散居民。「巴迷」facebook專頁「柏斯敦巴士台」噚日都以為政府租巴士去疏散居民，但佢哋都好理性，網上呼籲一眾巴迷唔好去災場拍攝巴士，以免發生危險事情加重搜救工作負擔，仲講明專頁唔會接收或張貼任何「特見」(巴迷術語，指「特別所見」)嘅照片。唔少人見過巴迷馬路追巴士影相嘅瘋狂情况，巴迷專頁雖然誤以為政府疏散居民，但今次呼籲都算係做件好事。至於嗰兩部巴士，其實係政府租嚟備用。 有網友就回應，「呢個時候，仲點會有心情影車呢……」。不過，有網民就反問，「咁又回歸一個問題，就算災場附近都好多市民駐足觀看，咁佢哋係咪又唔影得相呢？」
|
| |
| |
;){kind=small}
;)
