【明報專訊】城大冧屋頂咁大件事，教育局梗要跟進，局長吳克儉前日喺研討會度話，本來「諗住放假好舒服」，點知突然有天台倒塌，呢番話惹嚟批評；噚日局長出席立法會回答屋頂倒塌事件嘅緊急質詢 ，一眾議員冇手軟，民主黨黃碧雲批評吳克儉講埋啲涼薄說話，好無恥。工黨李卓人就似乎對教育局嘅跟進措施唔多滿意，話局長雖然冇放假，但睇唔到佢留喺度做咗啲咩緊急措施。

力證自己有做嘢 有視察城大

局長就話對議員提起放假呢件事感到莫名其妙，因為佢嗰番言論係出席一個研討會嘅發言，會議主題係「校長的角色」，係想說明校園入面任何事件都關校長事， 就算預咗星期六日放假，但星期五發生咗事，校長都要處理。局長又力證自己有做嘢，包括上周五屋頂倒塌後，佢去咗城大視察事故現場，又要求城大管理層喺兩個星期內提交報告，另外前日局方發咗信畀全港中小學，分區教育主任都聯絡咗各區學校云云，叫大家唔好誤解佢喎。