【明報專訊】好快就立法會換屆，噚日《明報》舉辦咗「香港新機會」高峰論壇，席間，互聯網專業協會(iProA)會長洪為民巧遇「對家」立法會資訊及科技界議員莫乃光，以及香港資訊科技商會榮譽會長方保僑，3個人一碰頭都好客氣，話其實大家識咗好多年。

Emily唔放過佢哋，問問洪為民有關50元可申請入iProA一事，洪為民話佢最關心有乜人係會員，但唔會關心佢哋係咪選民，所以佢好清楚記得當年自己一做iProA會長時，就收到莫乃光嘅書面退會信咁話。

洪為民亦問方保僑有無興趣入會，但方保僑就耍手擰頭，講笑話怕自己唔符合iProA會員專業資格要求喎。莫乃光笑笑口，無正面回應點解佢要退會。Emily又問洪為民，作為業界一分子，滿唔滿意莫乃光做IT界議員嘅表現， 洪為民好小心咁話，行內咩聲音都有， 唯一肯定嘅答案係，佢事務繁多，一定唔會同莫乃光爭做立法會議員。