【明報專訊】政府大力發展創新科技之際，科技園傳來高層變動，香港科技園公司噚日宣布其行政總裁馬錦星將於今年7月21日任期屆滿後退休，科技園已啟動繼任人招聘程序，適當時候會公布接任人選。 翻查資料，馬錦星自2013年7月出任科技園嘅CEO，到7月任期屆滿都只係做咗3年，加上佢只有63歲，喺呢個時候退下，難免惹人揣測離職真正原因，Emily本來想搵CEO了解下，但佢噚日透過公關婉拒。 不過，科技園公司董事局主席羅范椒芬就講咗幾句，佢話原來馬錦星上年續約時已講明只續多一年，因為佢太太同家庭都喺加拿大。但點解𠵱家先公布呢？羅太就話上年知道馬錦星只續一年時，咁啱政府同時又挖走咗當時嘅首席企業發展總監楊德斌，出任政府資訊科技總監，「唔想同時有兩個空缺，令大家心情不安」，所以獵頭公司開始招聘先同步公布消息。 羅太又希望繼任人係香港人，指創科局成立後，好多政策處於落實階段，所以繼任人要同業界多啲溝通。
|
| |
| |
;)
