【明報專訊】香港報業評議會噚日舉行會員大會，選出新一屆正副主席及執行委員會委員，做咗主席10年嘅陳韜文教授功成身退，由律師會前會長王桂壎出任新主席。至於陳教授就獲邀出任榮譽主席。

報評會最重要嘅一項功能係處理市民對報刊嘅投訴，過去一年佢哋收到嘅投訴中，有8宗投訴表面理據成立，12宗投訴表面理據不成立，2宗投訴不宜處理，1宗無法處理。投訴類型方面，投訴侵犯私隱佔12%，關於失實報道嘅佔42%，涉及不雅及煽情佔15%。而「其他」類別嘅投訴包括報道立場偏頗、嘩眾取寵、文字內容影射等，有31%。

報評會係一個自願組成嘅組織，於2000年7月成立，係香港第一個接受公眾對本港報刊投訴嘅專業自律團體。𠵱家有9份報章會員，包括《香港商報》、《星島日報》、《南華早報》、《香港經濟日報》、《明報》、《文匯報》、《中國日報》、《大公報》及《英文虎報》。