【明報專訊】政府司局長級官員嘅座駕，一向畀環團詬病馬力過大、碳排放過高，一啲都唔環保，只有接載環境局長的私家車慣例會採用當時最環保嘅車，例如以前嘅石油氣車、混能車，近年就轉用電動車。

Emily噚日撞到環境局長黃錦星，可以話眼前一亮，局長座駕變咗黑色嘅電動跑車Tesla。局長嘅新聞秘書話，局長原本用開嘅座駕係日產嘅電動車LEAF，車齡約5年，各方面都OK，但每次叉電續航能力只有百幾公里，但局長日理萬機，每日去唔同場合，有時地方又偏遠，好似噚日來回金鐘政總同屯門環保園，已經80幾公里，再去多個地方可能都要先叉電，隨時唔夠電用，𠵱家終於唔使煩，因為新車據講叉一次電可以行到接近400公里。

據Emily了解，換車係環境局主動提出，並獲物流署接納，以市價向生產商直接購入，而目前Tesla最平型號都要60萬，分分鐘貴過其他司局長座駕。