【明報專訊】郵政署長丁葉燕薇噚日出席立法會經濟發展事務委員會，公民黨郭榮鏗(Dennis)就問佢點解要用埋啲無聊時間同資源，遮住舊郵筒上面嘅皇冠徽號，又問署長郵費加價係咪用嚟做埋呢啲工作，仲問佢究竟係邊個做呢個決定。 署長就話，政府認為古郵筒展示英國王室徽號唔合適，而呢個決定係政府內部討論後作出嘅決定。但係Dennis就唔收貨，一再追問，話回歸以來呢啲郵筒已經用咗18年，唔明政府覺得啲郵筒點樣唔恰當，又話從來都無人話郵筒有個皇冠就會唔識寄信喎。 田﹕我都覺唔係佢決定 面對Dennis嘅連珠炮發，Emily見署長好似都唔知講咩好，呢個時候委員會主席田北俊就出嚟打圓場，話署長可能「有啲難處」，問Dennis可唔可以問過第二條問題。Dennis話其實都知未必係署長決定嘅，唔係想為難署長。田大少即刻抽水，話「我都覺得唔係佢(決定)㗎喇」。唔知佢哋兩個心目中係咪都有同一個答案呢？
|
| |
| |
;)
