【明報專訊】港鐵唔畀攜帶大型樂器嘅乘客入閘引起好大關注後，就話會檢討攜帶物件尺寸要求，預計一個月內完成。港鐵事務總監蘇家碧打上商台節目《在晴朗的一天出發》解釋，被問到檢討期間會否行使酌情權，蘇家碧話會研究，但就話如果只豁免樂器，可能會被人話港鐵處理唔公平；但如果整體放寬處理，水貨客或搬貨客就可能有更大空間搬貨，希望可以平衡考慮。
喺網上號召樂手帶大型樂器搭東鐵抗議嘅揚琴教師龍文慧就話，希望爭取攜帶大型樂器嘅朋友可以如常入閘。𠵱家港鐵話要一個月時間檢討，其間會繼續執法，佢質疑「唔通呢個月所有音樂活動就淨係call的士？」要求港鐵承諾修例，並且喺呢個月內會對樂器酌情處理。不過佢就強調，要求嘅酌情「單單係針對樂器」，因為「唔想有其他麻煩嘢出現」。
立法會鐵路事宜小組委員會委員胡志偉就建議港鐵，可以喺繁忙時段以外劃出一啲車廂，畀大型樂器同單車使用者，唔需要一刀切禁止。
;)
