【明報專訊】區議會選舉今個星期五開始接受報名，民主黨早前話部分考慮出選嘅選區同「傘兵」撞區，有啲更加協調唔到。「青年新政」召集人梁頌恆噚日喺《城市論壇》話，唔認同傘後組織出選區議會係「𠝹票」，佢話，青年新政唔係針對泛民政黨，唔會「夾硬撼落」原本屬於泛民嘅選區，而一啲泛民上屆輸咗、但仍然有繼續做地區工作嘅選區，亦唔係「青年新政」首選。梁頌恆話，社會對整個政局不滿，呢啲傘後組織嘅出現係畀香港人多一個選擇，可以揀一套更加能代表自己嘅理念。
青年新政否認針對泛民
民主黨副主席尹兆堅就回應話，唔會反對唔同團體嘅政治參與，但以民主黨為例，話佢哋無參選嘅區都超過300個，唔明點解「傘兵」仍然繼續撞區，又認為「選擇論」喺區議會層面上唔太成立，因為擁有相近票源嘅候選人會互相消耗，到最終唔止「傘兵」𠝹泛民票，更加係「大家𠝹大家」，令建制派漁人得利。
;)
