劉江華返老巢沙田派清潔包
[2015.08.24] 發表
【明報專訊】民建聯講完全港各處都有衛生黑點後，「成功爭取」政府搞「全城清潔2015@家是香港」，高官先後輪流落區掃地、抹欄杆，被網民戲指係「垃圾桶」嘅民政事務局長劉江華，噚日亦參與清潔活動，但佢並無出手清潔區內垃圾桶，只係派吓清潔包咁。
喺沙田起家嘅劉江華，噚日返去「老巢」，出席沙田區清潔香港活動，擔任主禮嘅除咗劉江華，仲有沙田區議會主席何厚祥、民政事務專員何麗嫦等，劉江華致辭時話，沙田區會推展全方位清潔工作，包括加強協調各政府部門嘅控蚊工作，安排青年義工協助清潔區內「三無大廈」、探訪長者等，傳遞清潔信息同獻上關懷。
而劉江華喺活動上就同其他嘉賓示範點樣洗手，同埋派發清潔包，但就無好似其他官員咁，身體力行去掃街清潔喇。
更多港聞
相關新聞
