大嚿病住開會 長者譚sir擔心
問高永文需否離開
[2015.02.05] 發表
【明報專訊】流感肆虐，立法會大會噚日就流感作緊急質詢，人民力量陳偉業(大嚿)都病咗，戴住個口罩去開會。民建聯譚耀宗話前日同大嚿開會已經好擔心，即刻問食物及衛生局長高永文，會唔會建議帶病嘅議員離開會場。高永文唔敢揸主意，就話病人應該睇醫生，由醫生判斷係咪適合工作。
65歲自稱高危族
譚耀宗話自己已經65歲，係「高危一族」，前日早上8點半見到大嚿戴住口罩開會開足4個鐘，又多次發言，自己同佢距離得10幾呎，自己又無戴口罩，所以覺得好擔心，於是佢拿拿聲趁機問本身都係醫生嘅高永文局長，會唔會建議帶病議員離開會場。
高局長一度喺會上叫大嚿保重，至於帶病係咪適合工作，局長話要睇醫生指示，又提醒大家戴口罩方法要正確。
更多港聞
相關新聞
