建制求復活有排傾
逾期申入小組 差啲要「跪喺度」
[2014.11.12] 發表
【明報專訊】立法會工務小組委員會噚日召開特別會議，討論建制派議員逾期加入小組嘅申請，泛民議員今個會期突襲成功成為小組「大多數」，上年曾經否決人民力量陳偉業加入人事編制小組嘅民建聯，主席譚耀宗就要求泛民「唔好一朝有權，就去弄權，家家有求」，譚sir又慶幸今次只係工務小組嘅小事，否則建制派隨時要「跪晒喺度，喺度喊晒口，要求畀個機會痛斥(改)前非」，反問泛民「係咪要咁樣」。
查實情况又無譚sir講到咁嚴重，因為一班逾期申請嘅建制派，除咗獨立謝偉俊，根本都無出席特別會議，只係覆咗封信畀秘書，有8個話自己助理遺漏或處理出錯，一個話因事無交表，另一個就話工務小組有效運作非常重要，因此要加入小組。有泛民議員提出逐項申請逐項辯論，睇吓佢哋係咪有充分條件加番入小組。
樹根罵偽君子 梁家傑發火
工黨李卓人認為，應該再次去信一班議員，等佢哋解釋清楚之前無加入小組嘅真正原因，但小組主席梁家傑話，驚「食檸檬食到酸得滯」，無答應阿人要求。民建聯鍾樹根就批評梁家傑係「偽君子」，有酌情權但唔用，搞到傑哥發晒火，因為議事規則寫明，除非逾期加入者係因病或未及回港才能申請加入，否則主席無酌情權。
結果傾吓傾吓，小組開咗成兩個鐘頭會，都係決定唔到係咪接受申請，要擇日再開會。其實，若小組否決申請，逾期加入小組嘅議員可以喺財委會上訴「復活」，客觀上，?家決定唔上唔落，對建制派更頭痛。
更多港聞
【明報專訊】全港有99萬名長者手持「長者卡」，適逢今年係「長者卡計劃」推行20周年，社會福利署同香港社會服務聯會（社聯）準備喺嚟緊嘅星期日（...
詳情
相關新聞
