【明報專訊】有啲人話佔領運動有外國勢力支持，噚日下午「朝鮮最高領導人金正恩」就到訪金鐘佔領區！佢先喺佔領區行咗一圈，即刻引嚟近30個市民圍觀，有啲仲上前同佢握手、自拍，同平民百姓影完相，佢仲走咗去同國家領導人習近平拎住黃傘嘅紙牌合照。其實，呢位金先生唔係正牌金正恩，只係個樣有啲似啫。

Emily問「金先生」做咩出嚟，佢就用廣東話答「大陸CCP(共產黨)叫人拎住一票先，但又要nominate(提名)咗先，同北韓(朝鮮)有咩分別？」佢又拎咗一張寫住「北韓式選票，就係唔要」嘅橫額出嚟。

上大台欲發言 義工叫停

但「外國勢力」可能唔太鍾意本地傳媒，問唔夠兩句，「金大人」就掛住用英文接受外媒訪問，仲行上夏愨道大台想發表偉論，但最後被大台義工叫返落嚟。