【明報專訊】佔領行動引起唔少內地民眾關注，連早前捨棄香港、改喺美國上市嘅阿里巴巴公司主席馬雲都有評論。馬雲話，香港近期發生嘅佔領行動，同年輕人感到絕望有關，但佢認為年輕人不應該有過分嘅要求，雙方應該互相聆聽。
喺美國加州出席一個論壇嘅馬雲，被問到香港近期嘅示威，《華爾街時報》引述馬雲話，佔領問題唔只係簡單嘅政治，亦唔單係香港與中國嘅關係問題。佢又話，喺香港，全部大人都攞晒好嘅嘢，令年輕人感到絕望咁話。
馬雲又話，今次去荷李活，目的係了解電影業，正喺當地搵緊合作伙伴。佢又認為，內地需要更多文化產業，電影可以令內地人心理更健康，預期中國將會成為全球最大電影市場。
受惠於阿里巴巴上月喺紐約上市，根據《福布斯》富豪榜，馬雲已經以195億美元成為中國首富。新華社近日有篇其後撤回嘅報道，顯示中央近來對富豪都幾嚴厲，睇嚟馬雲都好「謹言慎行」。
;)
