【Emily】李明逵樂齡博覽煮番茄魚柳 修哥勁讚

警隊前「一哥」李明逵（左圖）噚日喺樂齡科技博覽下廚，煮出色香味全嘅「照護食」番茄魚柳（右圖），出席同一場合嘅演員胡楓大讚好好食，仲食唔停口。（讀者提供）

【明報專訊】人口老化，吞嚥困難患者愈來愈多，「照護食」市場亦愈做愈大。噚日喺樂齡科技博覽上，警隊前「一哥」李明逵即席示範煮出一味番茄魚柳，屬容易咀嚼嘅餐膳，色香味全，同場嘅演員修哥(胡楓)試食後大讚「好好食」，仲食到唔停口。

李明逵退休多年，仍孜孜不倦研習廚藝，曾跟烹飪能手梁許安璞學藝。李明逵話通過今次示範，最希望畀吞嚥困難者能夠享受食物，因為佢哋飲食辛苦，如果煮到一啲容易食又好味嘅食物，尤其係同家人一齊食，係一件好開心嘅事。佢仲解釋，番茄魚柳屬於IDDSI七級(即係容易咀嚼)，有咬口，濃度適中，一般人都啱食。所謂「容易咀嚼餐膳」唔係軟餐，適合牙力較弱(例如牙痛)嘅人食。

噚日社聯同香港防癌會亦攜手發布《照護食——家居篇：吞嚥困難患者照顧者全面手冊》，除咗介紹膳餐，亦為吞嚥困難者設計菜譜同改善吞嚥能力嘅運動訓練，會免費派發，同時可通過二維碼畀讀者即時連接至機構「照護食」網站。

更多港聞

【Emily】工聯會百人登艦 有後生讚海軍親民

【明報專訊】由解放軍海軍兩棲攻擊艦「海南艦」、導彈驅逐艦「長沙艦」組成嘅艦艇編隊訪港5日，工聯會噚日組織過百個會員同義工去咗昂船洲軍營，登上... 詳情