【Emily】兩傳媒搶閘爆撤辣 新聞處點名召喚 財案預覽行規禁外泄 偵測現場有人用Wi-Fi蛋
[2024.02.29] 發表
【明報專訊】財政司長陳茂波噚日朝早11點宣讀《2024/25財政預算案》，按照慣例，新聞處會安排傳媒提早約兩個鐘預覽，其間傳媒代表要「困」喺政總會議廳睇，唔准同外界通訊。新聞處今年格外緊張，晨早已喺會場嗌咪嚴正溫提大家唔可以對外聯絡，過咗冇耐仲話偵查到現場有人用Wi-Fi蛋上網，要求停止。不過，喺預算案宣讀前，已有至少兩間傳媒喺網上出「推送push」發報「撤辣」消息，新聞處職員隨即喺會場叫咪，公開點名召喚兩間傳媒嘅記者，話有事跟佢哋處理，引起行家一陣嘩然。
政府中人指敏感消息 或影響股價
預算案預覽資料唔可以外泄係一直沿用嘅行規，有政府中人解釋，由於預算案有樓市「減辣」資料，屬市場敏感消息，或對股價有影響，但估唔到有傳媒有方法可以攞到資料，仲喺陳茂波未出場前已爆料。兩間網上爆料傳媒，一為報章，一為網媒。政府中人話，佢哋有方法喺場內偵查信號，Emily噚日所見，現場不停有工作人員觀察記者用嚟打筆記嘅電腦，有無連接Wi-Fi。
無論如何，撤辣對地產行業以言屬利好消息，例如美聯集團早上11點，即陳茂波宣讀前，股價已聞風呈升勢。
節流印本減 限記者一人一份
另外，今年財案主要講節流，預覽會現場提供嘅《財政預算案》文本數量大減，限到場記者一人一份，Emily想拎多本返公司畀同事都唔得，有現場職員承認，今年印刷量減少，籲大家睇網上版。
更多港聞
【Emily】杏橙與粉紅 女議員「晨曦色」迎財案
【明報專訊】近年唔少官員同立法會議員都喺特首、財爺宣讀《施政報告》或《財政預算案》時，以主題顏色做「dress code 」。新一份預算案封... 詳情
【Emily】經民聯識搶鏡 道具刀「切辣」賀爭取成功
【明報專訊】財政預算案噚日發表後，多個政黨召開記者會回應措施，其中曾多次促請「撤辣」嘅經民聯識搶鏡，準備咗毛公仔刀同一大串辣椒道具「切辣」慶... 詳情
【Emily】探監3年感想 Emilia：付出非因愛情 係為所信原則
【明報專訊】民主派「35+初選案」中，47人被控《港區國安法》串謀顛覆國家政權罪，其中32人至噚日已還押3年，至於獲保釋嘅被告大部分都唔活躍... 詳情
【明報專訊】早前《施政報告》提出喺康文署戶外康樂場地引入智能健身設施，文體旅局楊潤雄噚日書面回覆立法會議員梁毓偉質詢透露，康文署將會推行試行...
詳情
教育開支佔比10年次低 學士料最快下年加學費 指非恆常措施 取消代繳DSE費
【明報專訊】《2024/25年度財政預算案》公布，2024/25年度教育開支預算1157億元，佔政府開支總額約14.9%，按年減少0.2個百... 詳情相關新聞
