【Emily】3月盛事Dior時裝騷延期

【明報專訊】政府今年1月公布上半年一系列盛事，前日又公布「藝術三月」活動，當中活動名單都有3月23日舉行嘅Dior男裝秋季時裝騷(Dior Fall 2024 Men's Show)，但一直未見詳情。不過噚日有報道話呢個時裝展將會延期舉行。Dior未有正式公布，Emily向有關方面了解過，證實消息屬實，據知係Dior總部嘅決定，至於延期嘅原因或延到幾時就未知。文體旅局回覆話收到主辦單位通知活動將會延期，又話大型活動延期舉行時有發生，政府繼續歡迎大型活動喺香港舉行。

文體旅局：大型活動延期時有發生

今次嘅Dior時裝展一直未公布舉行地點，早兩日仲有傳會選址西九文化區嘅M+博物館。其實Dior喺2014年曾經喺香港舉行春夏季高級訂製系列時裝騷，當時就選址西九龍直升機停機坪。另一國際品牌LV上年11月就喺尖沙嘴星光大道，以維港為背景舉行過初秋男裝騷。

據之前報道，文化藝術盛事委員會主席鄭志剛有幫呢個騷穿針引線，佢之前仲喺Ig上載同Dior男裝藝術總監Kim Jones及法國球星兼Dior全球大使麥巴比嘅合照。今年1月喺政府公布一系列盛事嘅記者會，有傳媒問麥巴比會唔會來港參與，鄭話要交由時裝品牌公布。據知呢個時裝騷唔涉及盛事基金資助，但文體旅局、相關部門、文藝盛事委員會全力支援舉辦細節。

更多港聞

【Emily】兩航空推機票套餐 來回台北最平660

【明報專訊】想去旅行但搶唔到平機票，不坊考慮吓航空公司嘅機票套餐，近日香港航空同大灣區航空分別有唔同優惠，香港航空推出年票，有台北、大阪、東... 詳情

【Emily】立會新春午宴致辭 梁君彥：23係港lucky number

【明報專訊】《基本法》23條立法諮詢下星期三（28日）完結，立法會噚日舉辦新春午宴，特首李家超等官員同行政會議成員都有出席。立法會主席梁君彥... 詳情

【Emily】港府在穗設自助機 可辦50港服務

【明報專訊】創科及工業局噚日公布喺廣州珠江新城嘅政務服務中心設置首部香港「跨境通辦」自助服務機，身在內地嘅市民可以用呢部機申辦50多項香港政... 詳情