【Emily】港台區選論壇問題貼地 涉野鴿、露宿者、遊客滋擾
[2023.12.02] 發表
【明報專訊】港台主辦一連4日嘅區議會選舉論壇噚晚開鑼，港九地方直選候選人都獲邀出席，每人有30秒介紹政綱及1分30秒問答環節，隨機抽問題作答，Emily發現問題都幾「貼身」兼「刁鑽」。中區自由黨候選人馮家亮抽到嘅問題係，區內野鴿影響環境衛生，問佢係咪贊成立法禁止餵鴿，佢話支持嚴厲打擊餵鴿，但話喺澳洲讀書時去過唔少動物園，大膽建議漁護署收集野鴿送去郊外或區內嘅動植物公園，畀附近居民可以去「打招呼」。
另一名中區候選人彭舜玟抽到嘅問題，就係如何處理鴨巴甸街一個聾啞露宿者長期「霸佔」街道並且堆積雜物所帶來嘅衛生問題，彭認為要「人性化」處理，先了解佢點解露宿，再幫佢解決困難。
西區新民黨候選人吳家超就被問到，內地「小紅書」不時推薦遊客到堅尼地城新海旁「打卡」，佢會點解決交通安全同滋擾問題，吳回答話政府應反過來喺小紅書推廣海濱長廊，以減少遊客去新海旁對居民嘅滋擾。
其他中區候選人包括民建聯施永泰、新民黨郭杰駿及謝戰；其他西區候選人包括民建聯劉天正、李楚婷、劉家昂及王倩雯。
更多港聞
【Emily】陳健波口頭報告 尚海龍話漏point
【明報專訊】上年12月經補選加入立法會嘅選委界議員尚海龍（圖），至今上任近一年，不時因唔熟悉議事規則或運作而「語出驚人」。噚日立法會內務委員... 詳情
【Emily】中環10米聖誕樹亮燈 提早報佳音
【明報專訊】踏入12月，街上聖誕節氣氛漸濃。冠君產業信託旗下嘅中環花園道3號今年舉辦大型戶口聖誕社企市集，現場仲有一棵10米高嘅巨型聖誕樹，... 詳情相關新聞
