【Emily】經民聯新春花車 出動兩個「財神」
[2023.01.26] 發表
【明報專訊】噚日大年初四，經民聯搞新春花車巡遊，落區同市民拜年，黨主席、立法會議員盧偉國同青委會顧問趙式浩更以財神裝扮現身，向市民派發裝有朱古力金幣嘅賀年利市。盧偉國話，由於政府放寬防疫限制，今年可以復辦巡遊。
盧偉國聯同黨內一眾地區支部正副主席、地區顧問同社區主任等數十人，噚日到九龍塘舉行花車巡遊啟動儀式。其中趙式浩攞住一個金元寶，有唔少市民上前揮手打招呼，亦有小朋友同兩個「財神」合照。花車先後到九龍同新界多區巡遊，並向市民派發抗疫用品，提醒注意個人衛生。
民建聯議員葛珮帆、陳勇同該黨沙田支部噚日亦於區內舉行賀年花車巡遊，同「財神」一齊向街坊派發小禮物，送上祝福。
更多港聞
相關新聞
