【Emily】中大辦賀歲展 有20件兔文物
[2023.01.21] 發表
【明報專訊】中大文物館將舉行「癸卯說兔」賀歲展，展期由2月25日至5月18日，免費入場，逢星期四休館。展覽會展出超過20件同兔仔有關嘅文物，包括璽印、銅鏡、硯台、瓷器、書畫等。雖然展覽未正式開放，但新年期間，有興趣嘅市民都可以去到Google藝術與文化平台，搜尋展覽嘅名稱，就可以先睹為快。
中大文物館話，唐代流行以月宮場景裝飾銅鏡，嫦娥代替西王母，同蟾蜍、搗藥玉兔、桂樹搭配，構成「月」嘅圖案元素，文物館館藏之一嘅銅鏡(上圖)就唯獨缺少嫦娥，或者係比喻照鏡者即如天仙。
文物館又話，從各種文物可見古人對兔觀察入微，反映兔同人類親近，而器物上嘅兔形象多變，有唔同表現手法，而展品之一嘅玉兔(下圖)就呈現咗兔嘅靈巧可愛形象。
更多港聞
相關新聞
