【Emily】梁熙兩撳發言掣最快 議員佩服
[2022.11.05] 發表
【明報專訊】立法會教育事務委員會噚日開會時，一度出現系統故障，部分議員第一次撳發言掣後系統無反應，自由黨張宇人仲消失喺輪候發言條隊，委員會主席梁美芬徵求大家同意後，決定全部再撳一次發言掣，結果兩次都係民建聯梁熙撳得最快，其他議員仲拍晒手示意佩服佢，梁熙話個個都問佢點樣可以咁快。
另外，政府同政黨近期都搞唔少對外宣傳，早排民建聯分別組團去過東盟國家外訪，主席李慧琼負責帶團去印尼，當時隨團嘅梁熙同黃英豪下星期會再出發去當地。梁熙同Emily講，今次主要趁B20峰會喺11月13日至14日舉行期間，同當地商會、其他國家嘅商界領袖見面，希望透過會議、聚餐進一步鞏固關係，如果佢哋對投資香港或內地有疑問，盡可能幫佢哋解決問題。
更多港聞
相關新聞
