【Emily】公民黨集思會料商去留 梁家傑擬卸任主席
【明報專訊】公民黨領導層將喺年底換屆,黨主席梁家傑同Emily講,佢傾向卸任主席一職,而公民黨將喺月中召開集思會,無訂議程,預計到時會有黨員提出討論公民黨何去何從,包括係咪要轉型或者解散。
梁:倘轉型面對人才資源凋零
傑哥透露,適逢換屆在即,公民黨將喺9月18日召開集思會,畀黨友提出關注嘅議題,預計會觸及公民黨嘅前途問題。對於前景,佢話如果公民黨未來無可能喺議會存在,轉型亦要面對人才同資源凋零等限制,的確唔容易搵人接任領導層,不過「無話可唔可惜」,強調公民黨當年只係喺時局下應運而生。
公民黨執委會今年底任滿,根據公民黨網頁,現時只有6名執委在任。梁家傑同Emily講,自己喺2016年起一直做黨主席,係時候退落嚟,但佢亦承認,卸任同現時嘅政治、社會環境有關。
傑哥又話,暫時未聽聞有黨友有意出選主席。睇番傑哥近期嘅facebook,佢已經好少講時政,主要都係記錄自己嘅生活點滴。