【Emily】九巴明年換制服 車長著紅黑Polo恤
【明報專訊】九巴2011年4月起使用嘅車長青色恤衫制服即將成為歷史。九巴噚日宣布會喺明年1月10日起,陸續為車長、站長同站務管理員更換新制服。新制服由九巴同本地服裝品牌Baleno合作設計,其中車長制服採用Polo恤,以紅色同黑色為主調。九巴話新制服採用速乾透氣、高伸展性嘅物料,可保持乾爽舒適,方便車長靈活工作,又話新制服增加垂直嘅銀灰色反光條子,有助保障車長工作安全,亦會嚴格遵守環保採購要求。
至於車長嘅冬季制服,就另配黑色抓毛外套同風褸,下半身配深灰色長褲。九巴站長同站務管理員嘅新制服就以天藍色同黑色為主調。九巴話,換新制服之前已聽咗員工等多方面嘅意見,除咗為員工建立活力同專業嘅形象,亦體現九巴創新同注重環保嘅精神;而龍運亦計劃換新制服,正等緊運輸署審批。
另外,新巴城巴嘅母公司「匯達交通」噚日同職業訓練局簽署諒解備忘錄,提供首個專為巴士服務同維修業度身訂做嘅專業培訓課程,最快2023至24學年收生。