【Emily】「土法」牙膏止痕 阿廷談獄中消暑

【Emily】「土法」牙膏止痕阿廷談獄中消暑

[2021.05.28] 發表

【明報專訊】多名民主派身在獄中，天氣炎熱令人格外關注。民主黨林卓廷嘅小編噚日話，近日探阿廷，對方膚色愈見黝黑，身上熱痱「增長又消褪」，有藥都無辦法斷尾。但阿廷叫大家唔使擔心，佢仲捱得住，仲分享喺獄中點消暑。小編引述阿廷話有賴睇得National Geographic嘅節目多，知道人體最快散熱部位係頭同頸，所以佢會不斷用濕毛巾抹頭同頸，再去大風扇前吹乾。

濕毛巾抹頭頸大風扇吹乾

阿廷又話，如果不幸生熱痱，可以用牙膏做土製止痕膏；夜晚瞓地下就會較涼快，如果極熱時會先淋濕塊地，再瞓喺水上，話至少可以幫助入眠，不過佢形容呢個只係有好過無嘅方法，只可稍減難受程度。

「快必」譚得志嘅小編亦更新快必情况，話問及快必喺還押中貼信封究竟賺咗幾多錢，快必就話𠵱家都有成600幾蚊，可惜每月月尾先可以買一次零食同物資，但5月31號係初選案上庭之日，即係大家都被迫儲錢無得使。

快必瞓覺有小強親吻肚皮

快必又話天氣真係熱，相信女囚友要著長褲更慘，佢自己返到倉就會著捲起咗嘅孖煙通，但有晚只著孖煙通瞓覺時痕醒咗，發現原來有小強喺佢肚皮「親吻」緊佢。