【Emily】美食節禁試飲試食 商戶改「外賣」

一連5日的香港美食節噚日喺會展開幕，場內禁止飲食，試食試飲「消失」。有賣蒜醋飲品嘅商戶推出試飲「外賣」，市民離開場地後先可以飲用。（賴俊傑攝）

【明報專訊】新冠疫情反覆，原定去年底舉行嘅「冬日美食節」變成「春日美食節」，延期至噚日喺灣仔會展開鑼，但令人垂涎三尺、最能吸引人流嘅即場試食就「消失」咗，場內禁止飲食。有商戶連冲茶畀客人試飲，都要改成外賣包裝畀個客攞走試，慨嘆「無試飲好難說服客人買」；有入場市民就話無咗試食，「完全無乜吸引力」。

吸引力減 回頭購買客少

噚日係長假期首日，但美食展人流唔算多，多間商戶都話人流較以前少。以前靠試飲招徠生意嘅茶葉商店「醉茶」負責人鄭先生話，唔可以提供即場試飲，生意大跌三成，就算提供外賣包裝嘅試飲茶水，畀客人帶離現場享用，「回頭購買率」甚低，但前年疫情前已交場租，迫於無奈要照常開檔，話如果早知，未必會參展。

美食節常客蔡女士覺得「無得試食差好遠」，以前「試食完會買」，但現時「完全無乜吸引力」，不過佢都明白除口罩食嘢會增加感染風險，所以喺展場買咗過百元熟食，拎去住附近嘅朋友屋企享用。

雖然場內禁飲食，但仍有熟食檔。九記食品廠職員李小姐話熟食只能外賣，令顧客卻步，生意較預期差超過三成，反而凍貨好似魚蛋、燒賣呢啲香港人鍾意嘅小食就大受歡迎，半日已經賣咗超過700包。