【Emily】建制派警總送禮 8人合照 警話無犯聚

香港再出發大聯盟秘書長譚耀宗（左二）、副秘書長譚惠珠等人噚日到香港警察總部慰問警隊，並送上多箱物資，包括口罩等。數一數，圖中合照有8個人，究竟有冇違反二人限聚令呢？警方話冇，因為呢度唔係公眾地方。（香港再出發大聯盟提供）

【明報專訊】呢排唔同嘅建制派組織、社團輪流去慰問警察，噚日就到香港再出發大聯盟去灣仔警察總部外，向警隊送上新春慰問，仲有埋禮物，包括：十幾箱涼茶、口罩。大聯盟秘書長譚耀宗、副秘書長譚惠珠、黃英豪、張志剛等齊齊戴上充滿賀年氣氛嘅「福」字口罩，親自去送祝福。

被質疑人代有特權

警：非公眾地方

數數人頭，一齊影大合照嘅都有8人。民主黨成員、南區前區議員柴文瀚喺facebook上載香港再出發大聯盟慰問警隊的截圖，話自己因工作協調向政府遞信安排時，無意中超過當時限聚令嘅人數上限，甚至只係入鏡時多出一個人，現場都有警察極唔客氣，佢質疑係咪因為人大代表等已注射內地疫苗，抵抗力強，就可以享有香港平民冇嘅特權，集體向警方送禮兼大合照。

Emily向警察公共關係科查詢香港再出發大聯盟噚日嘅慰問活動有冇違反二人限聚令，對方回覆話，一個團體成員噚日曾到訪警察總部捐贈物資，而警察總部3樓會客區不屬於公眾地方。佢哋又話，警隊會遵從「限聚令」訂明嘅措施，繼續攜手抗疫。