【Emily】嬲唔擴兩元乘車優惠 民記財會鬧政府
[2020.10.24] 發表
【明報專訊】對於兩元乘車優惠計劃門檻降至60歲，日前有報道話政府可能會推遲落實，引發民建聯、工聯會等建制派非常不滿，有議員更聲言政府應重新考慮交上立法會審批嘅人事編制、工程項目。財委會噚日開會，民建聯亦「借題發揮」，批評政府想唔做兩元乘車優惠(降門檻)；加上泛民亦不斷發問，最終3個幾鐘嘅會議未能表決第一個項目。
3個幾鐘會議 未能表決一項項目
噚日財會首項議程係審議財庫局申請開兩個常額職位，以推展就唔同措施提供指導、意見，民建聯鄭泳舜提問時質疑，現時好多市民失業，又有傳聞話政府因為擔心兩元乘車優惠涉及開支大而有阻礙，批評政府有無深思疫情下點解仲要開位請人、點解唔內部調配人手處理。該黨柯創盛亦質疑開位係咪需要；民建聯主席李慧琼更話，近日有傳政府因當前經濟情况而唔放寬兩元乘車優惠，批評政府「拎長者開刀」，又要求政府檢視係咪可以壓縮開支。
如果泛民唔拉布 可能否決埋項目
到會議後期，唔少建制派已離席，民主派就不斷提問，最終完會前都未能表決。Emily聽聞，建制派對政府有氣，唔會輕輕放過政府申請撥款嘅項目，有建制派話如果噚日泛民唔拉布，趁建制少人偷襲，項目更可能被否決，笑言泛民都有幫政府一把。
更多港聞
【Emily】《再說皇都》網上研討會 頭炮細說北角
【明報專訊】68年歷史、屬一級歷史建築物嘅北角皇都戲院，係北角同香港娛樂文化地標，早前被申請強制拍賣，近日由新世界發展投得，將展開保育同復修... 詳情相關新聞
