【Emily】KM出獄即刻想寫書
[2020.03.17] 發表
【明報專訊】佔中發起人、中大社會學系退休副教授陳健民(KM)上周六出獄，噚日接受網台D100訪問時透露工作計劃，話目前想寫書，包括將獄中書簡結集出版，希望今個月內整理好書稿、封面設計；另一本書主要係審訊前佢喺中大「最後一課」嘅內容。KM亦自言有責任將2013年佔中醞釀，直到佢入獄嘅回憶記錄低，話過往本土派、民主派互相攻擊令佢心痛，所以一直擱置，但反修例運動強調「兄弟爬山」，令佢有力量寫番。
重返中大 第一件事去二號橋
KM透露自己前日重返中大，第一件事就係去舊年發生衝突嘅二號橋；佢形容校園已經修復唔少，疫情下校園無人，有少少荒涼。佢之後去咗沙田搵黃店食麵，見到裏面文宣好靚，都忍唔住「嘩」出聲。至於獄中生活，KM自言都頂得順，但出獄後先知自己多咗白頭髮。佢話獄中環境較嘈，有時都會困擾，最辛苦係見到太太、家人情緒差，佢返到囚倉自己就會好沮喪。
獄中睇無綫 「未見過警察打人」
KM喺反修例風波時身陷囹圄，佢話喺裏面「未見過警察打人」，因為獄中只睇報紙或者無綫新聞，「只見到示威者打人私了，警察打人鏡頭好少」，又話自己初初入獄，囚友會因為佢係佔中發起人而鼓掌，但後期有囚友就對住電視機鬧示威者「暴徒」，令佢覺得喺入面有啲孤寂。
更多港聞
【明報專訊】立法會選舉料9月舉行，噚日政制事務委員會討論選舉指引，新民黨主席葉劉淑儀火力十足，鬧政府「縮骨、卸膊」。話說立法會選舉指引正諮詢...
詳情
【Emily】醫生讚任勞怨 網民好想張竹君有假放
【明報專訊】近排衛生防護中心幾乎每日都開記者會，4點半開電視多數會見到衛生防護中心傳染病處主任張竹君嘅身影，唔少人仲擔心佢日日開工，無得休息... 詳情
【明報專訊】社區組織協會早前要求平機會調查有食肆拒絕招待內地人涉歧視一事，唔單止令到身兼民主黨成員嘅幹事蔡耀昌畀黨內「逼宮」，社協話好多該會...
詳情
相關新聞
