【Emily】EQ抱住吹蠟燭 BB扁嘴想喊

民建聯立法會議員葛珮帆（抱BB者）下星期一（23日）生日，一班民記婦女事務委員會委員齊齊同EQ切蛋糕預祝，EQ抱埋助理嘅囡囡吹蠟燭。（何宛兒攝）

【明報專訊】民建聯立法會議員葛珮帆(EQ)噚日聯同民記婦女事務委員會委員講聖誕願望，委員仲夾埋EQ助理畀驚喜，送蛋糕畀下星期生日嘅EQ。EQ生日願望係天下太平，政府盡快將《窺淫罪》交立會審議，唔好拖到下屆。EQ助手帶埋一對寶貝仔女到立法會，EQ見到契仔契女眉開眼笑，抱住BB女吹蠟燭，不過BB突然扁嘴想喊，要媽咪抱走。

講番民記婦女事務委員會嘅「聖誕願望」，觀塘區議員顏汶羽話《僱傭條例》對女性生育嘅保障只限懷孕期間，有女士生育後返回崗位被無理解僱，佢哋希望改善條例，將保障延至產後復工一段時間。至於幾耐？EQ話唔會建議幾多日，希望勞顧會放喺議程討論。

家庭暴力政策方面，委員張琪騰話近日收多咗家庭摩擦有關嘅求助，可能因為經濟差、收入受影響，夫婦多咗拗撬，建議改良「施虐者輔導計劃」，增加為施虐者提供嘅輔導節數。佢哋嘅建議仲包括放寬「卵子銀行服務」門檻，畀遲婚女士冷凍卵子，同埋研究設立支持追討贍養費嘅機構。