【Emily】10月出獄 邵家臻獄中上食衛課程

【明報專訊】佔中九子案中，社會福利界立法會議員邵家臻被判囚8個月，預計10月3日出獄。佢助理噚日代為喺facebook更新近况，透露阿臻喺獄中繼續學習，上咗3日食物衛生經理證書課程，內容包括食物衛生、細菌形成、個案研究等，係佢喺獄中以來，首次接觸滑鼠同電子屏幕；佢坐喺課室，諗起自己喺浸大教書嘅情景，又諗起一班社工系學生。一直患糖尿病嘅阿臻早前亦就糖尿上眼問題打咗針，情况穩定，叫大家唔使擔心。

身陷囹圄，阿臻仍然記掛反修例運動，佢話距離出獄唔夠兩個月，好快會歸隊；又數到運動已經有8名社工被捕，包括「社工復興運動」嘅劉家棟。佢形容入獄最折磨嘅係資訊延後，每次知道有社工被捕，都會大驚、「發茅」，「真是急得眼紅」；面對其他年輕人同抗爭者被打、被捕以至盲眼，佢話同好多囚友都係心裏焦急，寧願自己頂上。