林卓廷籲邵家輝轉軚 做人民英雄
[2019.06.15] 發表
【明報專訊】星期三立法會外反對修訂《逃犯條例》嘅示威者同警方嚴重衝突，立法會取消大會，而噚日內會、財委會繼續開，民主派議員喺會上關心嘅仍然係修例，不停叫建制派議員呼籲政府撤回，兩個會議都要提早結束。
「自由黨主席個位即刻你做」
民主黨林卓廷喺會議廳外見到自由黨邵家輝，就不停游說佢轉軚反對修例，仲話到時做咗「人民英雄」，「自由黨主席個位即刻你做」。邵家輝無回應轉唔轉軚，但就話「最緊要係啲小朋友唔好受傷」。
喺財會內嘅唇槍舌劍激烈得多，泛民多番批評政府同警方嘅做法，又叫財會主席陳健波唔好開會，但波哥一再強調「政治還政治，民生還民生」，之後佢忍唔住同民主派對罵，話係示威者衝擊警方，民主派「埋沒良心」。
民主黨黃碧雲話，好多示威者都係好和平，修例搞到香港無平靜日子，「你講填海又好、廚餘又好，香港都無法向前」，叫波哥停止會議，打個電話畀特首林鄭月娥，叫佢撤回修例，先可以正常審議財委會嘅項目。波哥話自己無林太電話，但透過好多渠道叫咗林太慎重考慮。
會後，波哥畀記者問到係咩渠道，佢話係向特首辦主任陳國基表達關注，又話好多建制派都有努力為香港好。
更多港聞
相關新聞
