搞個電視台做《美男廚房》 鄭中基即場眾籌落台𢭃利市
【明報專訊】鄭中基前晚大年初二於紅館舉行第3場演唱會，邀得主持第一輯《美女廚房》節目的拍檔梁漢文和方力申擔任嘉賓，他們合唱串燒歌，改編歌詞不但自嘲，還鬼馬地「唱」其他藝人，三人更妙語連珠大放笑彈，令觀眾捧腹大笑。
梁漢文問觀眾有冇掛住他們？方力申搭訕說：「還是掛住屎味魚蛋、坑渠水味意粉呀？」鄭中基指已10年無做《美女廚房》，梁漢文即說：「人哋最近有做。」方力申則指：「那個是假的。」
揶揄方力申 想拍拖去投胎
鄭中基提議3人再做新一輯綜藝節目：「不如做個《美男廚房》？」引來全場觀眾哄動。方力申指他們變了，原本的「美女」幾好，鄭中基解釋：「我哋已經有家室，不可以亂食。」並叫方力申：「你想快點媾到女就去投胎啦！」方力申呻：「我真的好需要，好耐冇搞，真的好想搞……番個節目！」
梁漢文和鄭中基贊成合作，方力申說：「等我聽日返TVB傾下。」鄭中基插嘴：「不一定要TVB，現在有ViuTV。」梁漢文稱新一年應有大志：「我哋應該直接搞個台出來，播我哋的歌和戲，搞埋頒獎禮，全部獎都是我哋攞晒，神係我哋，鬼又係我哋，個台名我諗埋，就叫『T Viu B』！」鄭中基揚言要即場眾籌，於是合唱《財神到》，3人齊齊落台向觀眾𢭃利市，鄭中基最後說：「我哋會盡快開台㗎啦！」
開騷前好奄尖 感激老婆包容
這晚捧場圈中好友有林家棟、余香凝、黃又南，鄭中基爸爸鄭東漢和大女Emma繼續做表演嘉賓。
鄭中基在台上先後多謝爸爸和老婆余思敏支持，他說：「我每次開騷好麻煩，不嘈得、不煩得、好多東西不吃 ，老婆有辦法搞到兩個小朋友好似識手語，多謝她這幾個月的包容，知她好辛苦。」
鄭中基獨唱《想愛你》時甩嘴，尷尬掩頭大笑，雖然他立即執生唱完下半首歌，但他也感歉疚：「真的不好意思，唱過幾場都未試過，我真的不能容許自己這樣！」他要求重唱，獲台下拍手支持，唱完再自嘲：「離晒譜，來到呢刻先發台瘟！」
記者：鍾一虹
攝影：劉永銳
■更多娛樂猛料 ﹕ol.mingpao.com
