【明報專訊】噚日係香港回歸21周年，亦係特首林鄭月娥同問責團隊上任滿一年嘅日子，林太facebook上載一條約5分鐘、有關自己過去一年政績嘅短片，並話「希望喺未來日子裏面，繼續與大家同行」。林太形容自己服務港人365日深感榮幸，並用五大範疇介紹政績。政府新聞處發稿，話各司局長短片未來幾日內陸續上載。
林太噚日出席咗好多場活動，仲偕多個司局長，喺禮賓府同百多名過去一年曾於國際比賽獲獎嘅香港學生茶敘，當中最細嘅只有4歲。林太話，每次睇到佢哋為港爭光嘅報道都覺得好振奮，希望佢哋繼續努力貢獻香港。
5分鐘短片曬一年政績
政府亦公布2018年《施政報告》展開公眾諮詢，並以動畫版林太，呼籲大家就10月發表嘅施政報告提出意見。除咗特定專頁，大家仲可以去林太嘅facebook同Instagram留言畀意見。但Emily留意到，對大家一直以嚟嘅留言，林太可能太忙，少有回覆喎。
