分組賽之後，未見表現出眾的新星(未ready的潛力股倒有不少)，筆者的最佳11人之中逾半年屆「三張」。薑是老的辣，3名中堅全屬隊長，既統領防守亦助攻。3人統率後防、緊盯對手鋒將，及替隊友補漏。 高甸毋懼「高成個頭」的俄羅斯中鋒迪斯尤巴，全場緊盯令對手「一棟都冇」，起跳迎頂更見精準。格蘭基斯擔當瑞典劊子手，兩入12碼；堤亞高施華亦有頭槌入球。 兩星期車輪式睇波，印象中不少隊伍的防中均有好表現，做好搶截與捕位，能協助進攻更加可貴。拿傑迪錫保持水準，柴崎岳從出道時的進攻中場轉型，今屆墮後至防中，調節日本轉守為攻，對塞內加爾一戰的長傳助攻，更顯功架。邊路球員中，難忘對鏡頭大罵VAR「垃圾」的岩拉伯特，代表摩洛哥3仗均在右路滿場飛，中楣而未能入球亦瑕不掩瑜。 左路則較難選擇，帶起塞內加爾前線的沙迪奧文尼，及在西班牙擔任「疑似」輔鋒的艾斯高，表現較為穩定。 前線之上，C朗拿度一人救全家，唔揀會否被「媽叉」？另一席位，正宗中鋒買少見少，高大而腳下功夫不俗的迪斯尤巴，又入球又助攻，值得表揚。 其實，晉級球隊多數未臻完善，出局球隊不少單天保至尊，在整體戰時代變得獨力難支。最驚喜隊伍當數瑞士，一改悶波風格，多個位置集體進步，令球隊實力提升。
|
| |
| |
