【明報專訊】大嘥鬼早前推出「全城減廢大挑機」推動環保，大家連續7日分享如何減廢，亦可邀請朋友一齊挑戰，令政界人士不斷互相挑機，不過究竟大家係咪真係識得環保之道？民建聯葵青支部社區主任鄧麗玲早前接受挑戰，但其減廢之道就被網民批評喇，事緣佢周日喺facebook貼出一張食完嘢嘅空碟相片，呼籲眾人「食得曬(晒)，先好嗌，惜食是福」，但相片所見佢用嘅餐具係即棄碟、膠叉同膠刀。

呢張相引嚟網民討論，帖文被轉載後，有人批評鄧麗玲「口講支持減廢，實情係繼續浪費」，又質疑佢呢個行動已「斷纜」，鄧麗玲原本回應網民話決定罰自己做多一日當補償；噚晚佢再貼出自備餐具相片，並解釋上載有即棄餐具嘅相，原意係想帶出現時有餐廳喺堂食時仍然提供即棄餐具，繼而帶出「今天我會自備餐具作為 #減廢 行動的後續」，對自己無表達清楚引起不必要誤會致歉，並會重做7日減廢行動。