【明報專訊】商台噚日舉行立法會新界東補選選舉論壇，自稱係「神叫我去參政」嘅性傾向條例家校關注組成員趙佩玉，喺論壇上被網絡紅人陳玉娥(娥姐)狙擊，娥姐話趙佩玉嘅反對同性戀言論，係「三級嘢」、「抹黑天主」。趙佩玉聞言哽咽，亦想辯解，但被娥姐喝止，「制止佢講嘢，收聲、收聲呀、收聲呀」。黃成智喺論壇上坐喺佢哋中間，兩女疊聲鬧交時，黃生都幾無奈。 趙話天父叫參選 投票日有神蹟 趙佩玉話，2016年喺以色列祈禱時，「我親自聽到聲音，主係叫我去參選」，仲引述有教會嘅姐妹話，祈禱時都見到天父叫趙參選，仲見到天父將王冠、權柄同權杖畀咗趙，「(姐妹)話我喺政治界會得勝，當時有電流觸動我成身嘅感覺」。趙仲好有信心話，3月11日投票日會有神蹟，「天父同我講，我真係會贏」。 不過，娥姐似乎唔多認同呢位信徒候選人嘅言論，當大家談及同志問題時，反對同性戀嘅趙佩玉再講多元性行為、通姦等問題，娥姐就發炮怒斥趙「扮信徒講三級嘢」，批評趙嘅言論好恐怖、「整污糟我耳仔」，「天主無叫你講三級嘢，但你假借天主之名，抹黑天主……你千方百計整蠱天主，專登講三級嘢，天主係會懲罰你」。 在場嘅候選人仲有范國威、鄧家彪和方國珊。
|
| |
| |
;){kind=small}
